ವಿಶ್ವ ಒಕ್ಕಲಿಗರ ಮಹಾಸಂಸ್ಥನ ಮಠವನ್ನು ಸ್ಥಾಪಿಸಿರುವ ಜಗದ್ಗುರು ಶ್ರೀ ಕುಮಾರ ಚಂದ್ರಶೇಖರನಾಥ ಮಹಾಸ್ವಾಮಿಗಳು ಜನಿಸಿದ್ದು 10.02.1945 ರಲ್ಲಿ. ಇವರ ತಂದೆ ಕೆ.ಆರ್.ಪೇಟೆಯ ಶ್ರೀ.ಕೆ.ವಿ.ತಿಮ್ಮೇಗೌಡರು, ತಾಯಿ ಶ್ರೀಮತಿ ಸಣ್ಣಮನವರು ದಿನಾಂಕ 25.02.1968 ರಲ್ಲಿ ಆದಿಚುಂಚನಗಿರಿ ಮಹಾಸಂಸ್ಥಾನಮಠದ ಪೀಠಾಧ್ಯಕ್ಷರಾಗಿದ್ದ ಪರಮಪೂಜ್ಯ ಶ್ರೀ ರಮಾನಂದನಾಥ ಮಹಾಸ್ವಾಮಿಗಳಿಂದ ಸಂನ್ಯಾಸ ದೀಕ್ಷೆಯನ್ನು ಪಡೆದಿದ್ದಾರೆ.  ಉನ್ನತ ವಿದ್ಯಾಭ್ಯಾಸಕ್ಕಾಗಿ 1968 ರ ಅಕ್ಟೋಬರ್ ತಿಂಗಳಲ್ಲಿ ಬೆಂಗಳೂರಿನ ತಿರುಚ್ಚಿ ಆಶ್ರಮದಲ್ಲಿ ಆಶ್ರಯಪಡೆದು 1979 ರಲ್ಲಿ ಆದ್ವೈತ ವೇದಾಂತದಲ್ಲಿ ವಿದ್ವತ್ ಪದವಿಯನ್ನು ಪಡೆದಿರುತ್ತಾರೆ 1980 ನವೆಂಬರ್ ತಿಂಗಳಿನಲ್ಲಿ ಶೂದ್ರ ಸಮುದಾಯಗಳ ಜಾಗೃತಿಯನ್ನು ಗುರಿಯಾಗಿಸಿಕೊಂಡು ಬೆಂಗಳೂರು ನಗರದ ಹೊರ ವಲಯದಲ್ಲಿರುವ ಕೆಂಗೇರಿ ಗ್ರಾಮದ ವ್ಯಾಪ್ತಿಯಲ್ಲಿ ಖಾಸಗಿಯವರಿಂದ ತಮ್ಮ ಸ್ವಂತ ಹಣದಿಂದ ಜಮೀನನ್ನು ಖರೀದಿಸಿರುತ್ತಾರೆ. 20.11.1980 ರಂದು ಶ್ರೀ ವಿಶ್ವ ಒಕ್ಕಲಿಗರ ಮಹಾ ಸಂಸ್ಥಾನ ಮಠವನ್ನು ಸ್ಥಾಪಿಸಿರುತ್ತಾರೆ. 

ನಾಲ್ಕು ದಶಕಗಳಿಗೂ ಹೆಚ್ಚು ಕಾಲದಿಂದ ಶೈಕ್ಷಣಿಕ, ಸಾಮಾಜಿಕ, ಧಾರ್ಮಿಕವಾಗಿ ಸಮಾಜಕ್ಕೆ ಸೇವೆಯನ್ನು ಸಲ್ಲಿಸುತ್ತಾ ಈ ನಾಡಿನ ಹಿರಿಯ ಯತಿಗಳಲ್ಲಿ ಒಬ್ಬರೆನಿಸಿದ್ದಾರೆ.  ಪೂಜ್ಯರು ಕಾಯಕ ಯೋಗಿಗಳಾಗಿದ್ದು, ದಣಿವರಯದೆ ದುಡಿದು ವಿಶ್ವ ಒಕ್ಕಲಿಗರ ಮಹಾಸಂಸ್ಥನ ಮಠವನ್ನು ಕಟ್ಟಿ ಬೆಳೆಸಿದ್ದಾರೆ.  ಶ್ರೀಮಠದಲ್ಲಿ ಸುಪ್ರಸಿದ್ದ ಶ್ರೀ ಮಹಾಮೇರು ಪಂಚಮುಖಿ ಗಣಪತಿಯನ್ನು ಅಧಿದೈವವಾಗಿ ಪ್ರತಿಷ್ಠಪಿಸಿದ್ದಾರೆ.  ನಕ್ಷತ್ರಾಕಾರದ ವಾಸ್ತು ರಚನೆಯ ಈ ಬೃಹತ್ ದೇವಾಲಯ ಪ್ರೇಕ್ಷಣಿಯ ಸ್ಥಳವಾಗಿದೆ.  ಈ ಭಾಗದ ಜನರಿಗೆ ಉನ್ನತ ವಿದ್ಯಾಭ್ಯಾಸ ನೀಡಬೇಕೆಂಬ ಸದುದ್ದೇಶದಿಂದ ಶಾಲೆ, ಕಾಲೇಜುಗಳನ್ನು ಸ್ಥಾಪಿಸಿರುವ ಪೂಜ್ಯರು ಉಚಿತ ವಿದ್ಯಾರ್ಥಿನಿಲಯ, ಸ್ಪರ್ಧಾತ್ಮಕ ಪರೀಕ್ಷಾ ತರಬೇತಿ ಕೇಂದ್ರ, ಅನಾಥಾಶ್ರಮ, ವೃದ್ದಾಶ್ರಮ ಮುಂತಾದವುಗಳನ್ನು ಸ್ಥಾಪಿಸುವ ಧ್ಯೇಯವಿರಿಸಿಕೊಂಡು ಮುನ್ನಡೆಯುತ್ತಿದ್ದಾರೆ, ತ್ರಿವಿಧ ದಾಸೋಹದ ಮೂಲಕ ಶ್ರೀಮಠದ ಸೇವೆ ವಿಸ್ತಾರಗೊಳ್ಳಬೇಕೆಂಬ ಆಶಯದೊಂದಿಗೆ ಶ್ರೀ ಗುರುಜ್ಞಾನ ಕೇಂದ್ರ ಟ್ರಸ್ಟ್‍ನ ಧರ್ಮದರ್ಶಿಗಳು ಮತ್ತು ಶ್ರೀಮಠದ ಸದ್ಬಕ್ತರ ಅಪೇಕ್ಷೆಯಂತೆ ತಮ್ಮ ಉತ್ತರಾಧಿಕಾರಿಯನ್ನು ನೇಮಿಸಲು ತೀರ್ಮಾನಿಸಿದ್ದಾರೆ.